BUENOS AIRES (AFP).- Argentina i Spaña a senk den nan krísis diplomátiko ku e desishon di gobièrnu di Pedro Sanchez pa retirá di forma definitivo e embahador na Buenos Aires, medida ku e presidente Javier Milei a anunsiá di lo no kontestá ku mesun desishon konsiderando e aktitut di Sanchez komo “un disparati di un sosialista arogante”.
E kruse diplomátiko pa e krítikanan di Milei kontra di Sanchez i esaki su kasá a kondusí na retiro dje embahador i palabranan fuerte di Milei ku a akusá e gobernante spañó di “perverso”.
Meimei dje krísis, Milei a ratifiká ku lo e biaha atrobe pa Madrid, kaminda dia 21 di yüni lo e risibí un premio di un instituto liberal. “Laga nos mira su gran kompleho di inferioridat lo permití pa e liberalnan spañó por galardoná mi persona”, segun el a skibi riba e ret X
Den un rueda di prensa, e minister di Asuntunan Eksterior spañó, José Manuel Albares, a anunsiá ayera e retiro dje embahador na Buenos Aires, ku a keda yamá djadumingu pa konsulta.
“No ta eksistí presedente di un hefe di estado ku ta bai kapital di otro pais, pa insultá su institushonnan i pa hinka su nanishi den asuntunan interno di otro”, segun Albares.
Poko despues, Milei a kontesta kalifikando e medida komo “un disparati di un sosialista arogante”.
“Esaki ta mancha e imágen internashonal di Spaña i ta un prueba dje arogante ku nan ta, pa kere ku nan ta e pais ku ningun hende por bisa nan nada”, segun e presidente argentino.
Milei ya a hisa tono djaluna ora ku el a regresá Argentina for di Spaña, kaminda e no a keda risibí ni pa Sanchez komo tampoko pa e rei, i te asta den un entrevista ku un kanal di televishon el a tilda e lider spañó di ta “un kobarde”.
