WILLEMSTAD.- Terasa Olinda, den kurá di kas di Roland Ròi Colastica i su kasá Junice Augusta, atrobe tabata tarima pa un aktividat artístiko kultural riba un nivel haltu.
Un konsierto di Pasku dediká na e gran pianista yu di tera Wim Statius Muller ku e aña aki a fayesé.
Na entrada tabatin un potrèt di Wim i na inisio di e programa Roland a konta di su amistat i atmirashon pa Wim. El a konta ku diferente biaha Wim a toka na su kas riba su piano riba terasa Olinda.
Esaki ta promé aktividat musikal ku Wim no tei. Annette Statius Muller, yu muhé di Wim tabatei i a risibí e palabranan di elogio tokante su tata na boka di Roland. Soprano di Aruba Tica Giel, un kantante klásiko ku ku un kuríkulo internashonal, ku kende Wim a duna diferente konsierto na diferente parti di mundu tabata e artista invitá. Ku su bunita bos, Tica a interpretá piesanan klásiko ku e ternura, simplesa i kalidat ku ta masha poko biaha nos ta eksperensiá aki na Kòrsou. Tambe Tica a usa su téknika di kanto klásiko pa e trese piesanan di Pasku popular i tradishonal na papiamentu, ingles spañó i algun idioma mas.
Pianista Johnny Kleinmoedig i trompetista Dennis Aalse a kompañá Tica tantu den su kantikanan klásiko komo esunnan popular entre nan Feliz Navidad di Celia Cruz di felis memoria. Dennis i Johnny a trese un dueto impreshonante: un kombinashon di Pícolo trompèt i piano.
Loke tambe a impreshoná tabata ora Tica a kanta e kansion Limbiamo (drinking song) di kompositor Verdi for di e obra La Traviata na Papiamentu pareu ku proyekshon riba skrin i kompañá pa Johnny.
Atala Crispulo, Natalie van der Hansz, Agnet Trotman i Rudsel D’Antonia, bistí di gala kada be segun un sierto direkshon tabata konta e historia di nasementu di Hesus.
Despues di pousa, Melania van der Veen a interpretá tres kantika di Pasku na e manera ku ta e so por. Merietza Haakmat a deleitá e públiko ku un sorpresa kantando e.o. Oh Holy Night na reggae. Rudsel D’ Antonia aparte di a aktua, a resitá e poesia ‘Mas ku nunka’ di Roland Colastica.
Tabata un anochi bunita, un anochi ku nivel musikal haltu. Mas ku shen hende a yena e kurá ku manera ya nos a kustumá di Roland ku Junice, tabata dòrná spesialmente pa e okashon. Mas ku shen hende a eksperensiá un konsierto di Pasku ku músika di diferente género riba e mesun anochi.