WILLEMSTAD - Órden hurídiko riba Kòrsou a keda gravemente konmové relashoná ku morto di kuater persona djasabra último riba Berg Altena. Ministerio Públiko (OM) Kòrsou ta tuma e kaso aki komo un hopi serio. Pa e motibu aki tambe a halsa e investigashon pa un Team Grootschalig Onderzoek (TGO). E kaso a haña e nòmber “TGO Berg Altena”. E team aki ta trahando full spit.

Ta trata di un investigashon kompliká, den kua ta importante pa testigunan duna deklarashon. Ministerio Públiko p’esei ta hasi un yamada urgente na testigunan pa nan mèldu nan mes. Tambe esnan ku por ta den poseshon di imágen di grabashon i/òf pòrtrèt. Tambe foto i grabashon ku no a keda publiká ainda. Tur esnan ku imágen i foto ta ser súplika pa mèldu nan mes. Tur kos por ta importante den investigashon di e krímen serio ku a tuma lugá. Spesífikamente e tim investigativo ta buska informashon tokante e outo ku a usa pa e huida i por ehèmpel tambe imágen di e ruta di huida. Tur otro informashon por resultá bálido i importante. Testigunan ta wòrdu yamá pa drenta den kontakto via telefòn 917 òf e liña anónimo via 108.

Wowo i orea di siudadanonan ta esensial komo informashon adishonal pa kualkier investigashon di polis i OM. No solamente den e kaso aki, pero en general pa tur investigashon penal.

Ministerio Públiko ta hasi tur kos den su alkanse pa identifiká e kulpabelnan, trese nan dilanti wes i hasi un demanda apropiá komo kastigu.