BANGKOK, TAILAND (AFP).- Thailand a bira e promé pais di zùitost asiátiko na legalisá matrimonio entre personanan di mesun sekso, despues di un votashon históriko den Parlamento ku a keda selebrá komo un viktoria pa e komunidat LGTBI+.
E Parlamento a aprobá e lei ku 130 voto na fabor, kuater kontra i 18 apstenshon, i awor e teksto tin ku bai pa rei Maha Vajiralongkorn pa e bira ofisial i por drenta na vigor 120 dia despues di su publikashon den e boletin ofisial.
Na momento ku e lei drenta na vigor, Thailand ta bira e di tres pais di Asia ku ta permití matrimonio di hendenan ku mesun sekso, despues di Nepal i Taiwan.
“Nos ta hopi orguyoso dje personanan ku a tuma parti na e momento históriko aki”, segun Plaifah Kyoka Shodladd, aktivista ku a traha den e komishon ku a analisá e teksto. “Awe amor a gana di e prehuisionan”.
E teksto ta kambia e referensianan na “hòmber” i “muhé”, i awor ta remplasá nan ku palabranan neutral.
Ademas, ta duna e parehanan homoseksual e mesun derechinan ku esnan heteroseksual ora ku ta trata asuntu di adopshon i herensia.
Despues dje votashon, e promé minister Srettha Thavisin, ku ta apoyá e komunidat LGTBI, a habri su residensia ofisial pa un fiesta.
“Nos a lucha durante di hopi tempu pa motibu di ta kere den igualdat di derechi pa tur hende”, segun el a komentá riba su kuenta X. “Amor ta bunita i poderoso”, segun el a asentuá.
Mas di 30 pais na mundu a legalisá matrimonio di hendenan di mesun sekso for di despues ku den 2001 Hulanda a outorisá e unionnan di pleno derechi entre parehanan di mesun sekso.
