WILLEMSTAD.- Riba djaweps, 25 di òktober 2018 ta tuma lugá e promé edishon di ‘The Flying Dutch’ na Kòrsou ku presentashon di entre otro e 5 biaha # 1 dj di Mundu, Armin van Buuren.
Despues di Amsterdam, Eindhoven, i Rotterdam ta promé biaha ku e evento di baile di mas grandi di Ulanda ta bin rumbo e área karibense. Benta di karchi pa e evento aki ta kuminsá djadumingu, 3 di yüni ‘online’, via DolfijnGo.com i tambe via diferente punto di benta konosí: Bottles, Miles Jazz Café, 24 uur uit de muur, Bruna, Mensing’s Caminada i Madero Lifestyle Store.
Banda di Armin van Buuren tin tambe presentashon di Sunnery James i Ryan Marciano, Sevn Alias i Jeon. E popular duo di dj Lucas & Steve tambe lo forma parti dje elenko artístiko. E popular dj lokal, dj Menasa ta e atrakshon lokal pa ‘The Flying Dutch’.
Anualmente ‘The Flying Dutch’ ta logra di atraé mas ku 80 mil bishitante. Durante dje evento e dj-nan ta wòrdu transporte di un siudat pa otro siudat ku yudansa di helikòpter.
E konsepto nobo na Kòrsou lo pèrkurá pa ku si bo gusta ‘dance music’ bo keda komplasé di un forma total ku dj’s manera Sunnery James & Ryan Mariano i Armin van Buuren. Pa e 5 biaha # 1 di Mundu, Armin van Buuren ta e promé biaha ku e lo presentá na Kòrsou.
E lugá di stashoná outo di di Mambo Beach Boulevard ta keda transformá den un área grandi di festival. Tur rant di asera lo keda kita i e tarima grandi di mas o ménos 50 meter hanchu lo ta un ku nunka ántes a keda presentá aki na Kòrsou, lo keda pone na altura di Lions Dive. Lo tin diferente stènt di bibida i kuminda.
E tim di promoshon ‘Sterck’ ta spera ku no solamente e públiko lokal pero a pèrkurá pa paketenan di biahe ‘Flying Dutch’ ta wòrdu ofresé na Ulanda, Boneiru, Aruba, Colombia i Sürnam.