MERKA.- Tres dékada a pasa for di e estreno dje promé episodio di ‘The Simpson’, konsiderá komo un dje serienan animá mas influyente den e historia di televishon i ku ta parse di tin un fuente eterno di hubentut.
‘E fin dje show aki ta nifiká e fin di mundu’, asina un dje fiel siguidónan dje serie a pone riba retnan sosial, esaki na momentu ku a bira konosí ku tin un posibilidat ku ‘The Simpson’, ku ta konta ku un multitut di fanátiko, yega su fin.
Ku mas di 670 episodio, e programa na diferente okashon a keda homenahiá den 2019, manera entre otro na e Festival di Sine di Tribeca na New York, kaminda a organisá un reunion kaminda gran parti dje ekipo kreativo i aktornan ku ta duna bos na e personahenan a partisipá.
‘Ma pinta Bart den sinku minüt riba un napkin’, asina e kreadó dje serie Matt Groening a afirmá indikando ku e personahenan prinsipal di ‘The Simpson’ a keda  diseñá tanten e tabata sinta den un sofa wardando pa reuní ku James L. Brooks, un dje produktornan.
Homer, Marge, Bart, Lisa i Maggie riba 17 di desèmber 1989 a keda estrená na momentu ku FOX Broadcasting Corporation a transmití e promé kapítulo di e serie dediká na nan.