WILLEMSTAD.- Djabièrnè último a tuma lugá na Cinemark e promé edishon di ‘The Skempi Caribbean Music Awards’.
Un anochi kaminda artistanan a keda poné den spòtlait. Bistí den trahe elegante un kantidat di artista a asistí na e anochi di galardon kaminda e enfoke tabata riba e ekselensia di e muzik Karibeño di aña pasá.
GALARDON
Galardon pa ‘The Best Upcoming Artist of the year 2016’ a bai pa Rich. Premio pa mihó kolaborashon di 2016 a bai pa Buleria pa e kansion “Reina di Pordon”, interpretá pa Izaline Calister i Ron Martis.
“Chinini” di Dongo a resultá e mihó albùm di 2016. E mihó kansion di 2016 a bai pa Gentz ku e kansion “No Bai”.
E mihó video di aña 2016 a resultá “Bo ta Santo”, interpretá pa Etienne Yarzagaray. Premio pa e mihó artista femenino di 2016 a bai pa Izaline Calister i e mihó artista maskulino a resultá Dongo. E banda mas popular di aña a resultá Buleria.
LEGEND AWARD
Durante dje anochi e duna honor na kuater leyenda di músika Karibeño. Esnan ku a keda honra ku un galardon di ‘The Dutch Caribbean Music Legend Award’ tabata Janiro “Ataniro” Eisden, Gilbert “Gibi” Doran, Oswin “Chin” Behilia i Rudy Plaate.