Rumbo pa Baranquilla 2018

WILLEMSTAD.- Ku un atleta, taekwondo ta un dje nuebe disiplinanan deportivo ku lo tin kompetidor na Barranquilla den representashon di Kòrsou den Weganan CAC. Theodore Heyliger ta e atleta ku a gana e derechi pa hasi e biahe pa e pais suramerikano.

Mundu Deportivo a papia ku Lianne Muller, presidente di Federashon di Taekwondo, i Gilson Lourens (trainer) komo ku e atleta mes ta den un trainings camp na Venezuela.

E deporte di taekwondo hopi aña pasá, na 1998, na Maracaibo a duna Antia Hulandes 2 medaya. Plata ganá pa Onno Buil i bròns di Charmie Sobers.

Ku Kòrsou hasiendo su debut den Juegos Centroamericanos y del Caribe (CAC), Theodore Heyliger tin e tarea pa defendé nos bandera. E hóben den dos seshon i pa un luna i mei, a hiba su preparashon na Venezuela.

Segun coach Gilson Lourens, e kompetensia lo ta fuerte. “Ta kontra di kampion olímpiko i kampion mundial nos ta bai bringa...pero nos ta bai ku un mente positivo”.

Lianne Muller ta trese dilanti ku nan a bai Mexico pa buska klasifikashon den dos kategoria. Sinembargo, pa fayo di rèfri nan a kai afó i a bin haña un ‘wild card’. Di regreso na Korsou, nan a traha duru i despues a skohe pa manda e atleta Venezuela. Heyliger tin komo 10 aña ta praktiká taekwondo, pero ta basta hóben ku un pa dos aña bringando riba nivel internashonal.

Lianne Muller: “CAC pa nos ta e kuminsamentu. E atleta ta den preparashon pa despues sigui pa Costa Rica Open, Aruba ‘Best of the Best’ i fin di aña Kampionato di Karibe.

Ounke ku Karibe ta un region relativamente chikitu den mundu di taekwondo, tòg e área ta konta ku paisnan grandi den e deporte manera Cuba, Colombia i Mexico ku ta ganadónan di medaya Mundial i Olímpiko.

Segun coach Lourens, nan tin un bista kaba dje posibel rivalnan di Theodor. Ta atletanan ku ya nan a topa den e klasifikatorio na Mexico. Pero esei no ta stroba nan pa mira dilanti ku optimismo.

Dirigentenan di Federashon di Taekwondo, trainer Gilson Lourens i presidente Lianne Muller.