NEW YORK, MERKA.- ‘Tidal’ e wèpsait pa ‘stream’ muzik kreá pa Jay-Z durante dje último dianan a krese enormemente esaki danki na e estreno eksklusivo dje mas resien disco di e rapper ku a keda publiká eksklusivamente riba ‘Tidal’ djabièrnè último.

“4:44”, a kombertí e plataforma den e aplikashon ku mas ‘download’ pa iPhones na Merka durante di djabièrnè i djasabra último, subiendo 163 puesto for di djaweps último.

Djaluna último e tabata na di 6 posishon, patras di aplikashonnan popular manera ‘Instagram’.

“4:44” ta e promé albùm ku e rapper ta saka den kuater aña i ku ta dediká pa konsolidá su imperio musikal. E reakshon tabata faborabel i riba retnan sosial ta karga ku letra dje kansionnan, esaki mas ku loke ta normal.

Jay-Z riba e albùm ta rekonosé ku e tabata infiel na su kasá, Beyonce i ta revelá tambe ku su mama ta un lesbiana.

E músiko a disidí di publiká su albùm eksklusivamente riba Tidal, ounke e no a informá ainda ku mas despues lo e ta optenibel riba otro plataforma manera Apple.

Tidal, un kompania di Noruega ku Jay-Z a kumpra na 2015, a informá aña pasá ku e tin 3 mion di abonado, ounke vários medio ta duda den e informashon aki.

Ounke su ekspanshon tabata espektakular, e ta hopi atras di su kompetidor Sueco, Spotify, ku tin 50 mion abonado i 90 mion hende ku ta usa su servisio grátis.