WILLEMSTAD.- Djabièrnè anochi e proyekto musikal nobo ku ta karga e nòmber ‘ONE’ a tene nan konferensia di prensa ku a tuma lugá na “ Le’Ciel” riba Caracasbaaiweg.
Pa kuminsá ONE a hasi uso di e oportunidat pa gradisí pueblo di Kòrsou, Aruba, Boneiru i Ulanda pa e reakshonnan positivo risibí pa e produkshonnan resien lansá.
Den un periodo kòrtiku ‘ONE’ a logra puesto number 1 i number 3 den tòp di piesanan mas solisitá na radio emisoranan lokal.
Komo un agrupashon musikal ku apénas 5 luna di eksistensia, ONE ta sumamente satisfecho ku e paso ku nan a dal den farándula.
Esei a resultá e motivashon pa tuma e desishon pa kontribuí na Karnaval di Kòrsou den su totalidat.
Pa e temporada di Karnaval ku kaba di kuminsá, ONE  a harma un ‘tim’ kompletu.

Tim ONE den Karnaval 2018
ONE ta super gradesido na e spònsernan ku a kere den ‘Tim ONE’ ku ta MCB i Licores Maduro. Nan no a duda niun momentu pa djòin e asina aportá pa hasi posibel pa ONE por bai bria durante henter temporada di Karnaval.
Pa Gran Marcha ONE a ‘team up’ ku Grupo di Karnaval ‘Bliss Curaçao’ ku fo’i promé instante a kere den e potensial di ONE.
‘Bliss Curaçao’ aña pasá a sa di terminá den e Tòp 10 di mihó gruponan di Karnaval den su promé aña partisipando na Gran Marcha. Pa 2018 Grupo Bliss su trahe lo reflehá un fantasia di ‘Art Deco’ durante di Gran Marcha.
Pa ‘Parada di Tiner’, ONE lo kompañá un dje gruponan di mas grandi ku ta ‘I Love Hip Hop and R&B’.

ONE den Tumba
Pa pone chèri riba e bolo, e maestro musikal, Randal Corsen a disidí di djòin ‘Tim ONE’ komo direktor musikal durante di e partisipashon di ONE na e festival di mas grandi di Reina ku ta Festival di Tumba.
Riba e anochi di presentashon ‘ONE’ a presentá tres kantante ku lo partisipá na Festival di Tumba ku ONE, Xavier Navarro, Stanley Clementina i  Dibo D.
Sigui ONE via di Facebook i Instagram: ‘OneCuraçaoMusic’ pa bo keda na altura di tur e desaroyonan relashoná ku ONE.
ONE tei pa tur hende. Pueblo di Kòrsou, Aruba, Boneiru i Hulanda...we are ONE!.