WILLEMSTAD.- Hues mr. Lasten ayera mainta a logra ku Federashon Futbòl Kòrsou i Remko Bicentini, huntu ku nan asesornan hurídiko, a yega na un akuerdo riba e montante ku lo paga Bicentini awor ku e federashon a disidí ku e entrenadó di selekshon nashonal mester laga espasio liber pa Guus Hiddink tuma over. Ayera mainta Korte a trata e kaso sumario durante kua por a tuma nota ku e dos partidonan tabata pará na distansia for di otro.

E kaso básikamente a drei rondó dje punto ku Bicentini a dirigí un karta na e asosiashon Coaches Betaald Voetbal (CBV) di Hulanda, den kua e ta splika di no ta di akuerdo ku e manera ku Hiddink ta tuma over, ya ku segun e kódigo di honor di C.V.B. no por pone un coach na lugá di un otro tanten e organisashon (klup i/òf federashon) no tin un akuerdo finansiero ku esun ku nan ta remplasá. A base di esei e propio Hiddink a keda den ‘background’ (e mes ta ko-fundadó di CBV), miéntras ku F.F.K. ta insistí pa Bicentini anulá e karta pa e por firma un akuerdo ku Hiddink.

Na inisio dje kaso a surgi un situashon desbentahoso pa Bicentini relashoná ku su  kuerpo di abogado, di kua dos ta na Hulanda. Den sala di Korte e tabata huntu ku mr. Henriquez, kende lo a pasa palabra pa e abogadonan na Hulanda pa nan trese nan puntonan via di video-conference. Hues, sinembargo, a trese dilanti ku for di 16 di òktober el a informá e abogadonan na Hulanda ku nan mester hasi un petishon ofisial di atmishon pa tratamentu dje kaso, pero ku nan e petishon no a drenta. Konsekuentemente nan por a sigui e kaso via video-conference, pero solamente mr. Henriquez por a hiba palabra.

...Hues. Mr. Lasten durante tratamentu dje kaso...

Mr. Henriquez su promé punto tabata ku FFK no a terminá e akuerdo di trabou ku Bicentini di forma korekto. For di 2007 Bicentini ta traha pa FFK i na 2016 su funshon a bira di trainer di selekshon. Di su parti, FFK su punto ta ku no tin un akuerdo laboral sino mas bien un akuerdo pa realisá sierto tarea. Komo di parti di Bicentini e abogado ta insistí ku ta akuerdo laboral, hues a splika ku den un otro prosedura por atendé e punto ei i komo tal a pidi pa laga e asuntu di ‘opdracht’ of ‘arbeidsovereenkomst’ afó.

Abogado Henriquez seguidamente a trese dilanti ku Bicentini no ke stroba preparashon di e selekshon i ku FFK tabatin sufisiente tempu, for di febrüari te awor, pa a yega na un akuerdo ku su kliente. Komo tal, e no ta mira ku FFK na e momento aki ta sinta ku e situashon ku urgentemente mester tin un desishon den e kaso. Pa e motibu ei e ke pa Korte deklará FFK no atmisibel den e kaso.   Un otro punto na fabor di su kliente, ta ku na 2018 FFK a ofresé Bicentini un akuerdo di trabou nobo i esaki inkluso te ku Kopa Mundial di Qatar si Kòrsou klasifiká.

Di parti di FFK, abogado Mr. Diaz a mustra riba e echo ku for di 3 di febrüari 2020 tabatin un kombersashon entre Bicentini i Hiddink i esei no tabata pa Hiddink yuda, sino ku Hiddink lo a bira e bondscoach. E siguiente paso tabata pa yega na un akuerdo finansiero ku Bicentini pa traha espasio pa Hiddink, pero FFK ta konsiderá ku eksigensia di Bicentini tabata irealístiko. Tambe Bicentini tabata rechasá tur proposishon.

Hues sra. Lasten a asentuá ku si partidonan yega na un akuerdo i Bicentini pone na konosementu di C.B.V. ku e ta retirá su karta i no ta apelá, ku e ora ei FFK por sigui ku Hiddink. Bicentini mes riba e punto aki a trese dilanti ku FFK a hasié dos oferta, pero “ku poko rèspèt” i pa e motibu ei e ta tene su mes na loke Hiddink a deklará i no ta dispuesto pa hala e karta aden. “E karta ei di 28 di ougùstùs 2020 ta loke a kondusí na e situashon aki, p’esei nos ta aki i Hiddink no a start. “Si bo hala e karta aden, lo e no ta un opstákulo pa Hiddink por start”, segun hues a bisa.

...Abogado mr. Diaz (r) ta papia ku dirigentenan di FFK...

Tambe hues a asentuá ku e propio abogado di Bicentini a trese dilanti ku e akuerdo ta pa tempu definí i esei ta duna FFK derechi pa anul’é. FFK ta ofresé salario di un aña i Bicentini no ta aseptá esei, siendo ku e diskushon no ta solamente riba montante sino tambe prestashon.

Hues a yega na e konklushon ku e ta ‘schors’ e kaso i duna partidonan 10 minüt di tempu pa yega na un akuerdo, sino e tin ku tuma un desishon. Despues di mas o ménos 15 minüt a reanudá e kaso i tabatin akuerdo finansiero ku a keda redaktá na e momento ei pa griffier i ku e dos partidonan a firma.