WILLEMSTAD.- Mañan pa 7or di anochi selekshon di Kòrsou ta subi tereno, pa enfrentá Jamaica den un wega krusial pa loke ta klasifikashon pa Mundial 2026.

Dick Advocaat a trese dilanti ku e tin 9 pa 10 hungadó den su kabes, ku lo por ta titular den e partido akí. E pregunta importante ta kua lo ta e formashon, òf ku otro palabra kon nan lo bai para riba tereno.

Probablemente tin dos opshon ku Advocaat lo ta pensando riba dje. E promé lo ta e tradishonal 4-3-3/4-2-3-1. Manera Advocaat mes ta indiká, esaki ta e formashon ku a duna selekshon di Kòrsou mas éksito bou di su mandato.

Aki ta hasi uso di un liña di kuater defensa, di kua dos ta sentral i e otro dos ta riba banda. Tin tres bolante kaminda un òf dos tin mas tarea defensivo, miéntras e otro ta mas enbolbí den atake. Miéntras dilanti bo tin atakante riba ámbos banda, i un sentro delantero.

E otro formashon ku Advocaat lo por ta pensa riba dje, ta e 3-4-3. Esaki ta un formashon ku lo por keda usá, pa e wega kontra Jamaica.

Aki bo ta usa tres defensa sentral, ku ta yuda krea stabilidat defensivo. Miéntras nan dilanti bo tin un liña di kuater, ku ta konsistí di dos bolante sentral i dos ’wingback’(defensa riba banda un tiki mas ofensivo).

Miéntras den atake bo tin atrobe dos atakante riba banda, i tambe un sentro delantero.

No opstante ku e formashon akí no ta asina usá pa Kòrsou, tin varios hungadó di selekshon ku ta hunga regularmente i ku a destaká den esaki.