WILLEMSTAD.- Doño di Radio Krioyo, alabes kompositor i kantante Darwin Gregg no tin masha bon palabra pa e asuntu di kobro di ‘royalties’. ‘Mi ta kere simplemente un persona a sinta pensa i studia un bon negoshi pa e hasi. Na Aruba, Boneiru i Kòrsou no tin asuntu di ‘royalties’ ku BUMA, el a bai afiliá na un dje kompanianan ku ta kobra royalties pa artistanan i a bisa nan ku e tin un negoshi i ku e ke tuma enkargo pa e tres islanan, anto e ta paga e kompania un montante pa aña pa e tres islanan, no tin hopi hende i tin un par di radio. Nan a dun’é un ‘fee’ i e ta firma akuerdo di representashon di e kas diskeronan. Djis hasi un konteo, si na e tres islanan tin 50 emisora, esaki ta nifiká 150 mil florin pa luna i pa aña 1.8 mion florin, e ta duna e kompania 100 mil florin mes, ta hopi sèn e ta kobra. El a mira e negoshi, anto awor e ta yega serka e bobo nan, pasó pa e tur e doñonan di radio lo mester ta bobo. Unda bo ta yega na e montante di 3 mil florin pa luna. Nos ta transmití riba YouTube i nos ta paga ‘royalties’ na YouTube ku ta shenti piku dòler pa aña!. Unda bo a sali ku 3000 florin pa niun ‘royalties’, ta kuantu biaha e piesanan ta drai riba radio kaminda ta kobra 2 pa 3 sèn, te pa e yega 3000 florin, esaki ta un indikashon di un abuso riba radionan lokal. E radio ku bai di akuerdo ku e proposishon aki ta hundi pareu kuné. Lo e no enrikesé su mes ku e sènnan ei. Tin hopi kaminda mas pa kana i no nesesariamente bo tin ku afiliá. Si bo ke bo ta paga bo ‘royalties’ dirèkt na kualke otro instansia internashonal. Riba un isla di 140 mil hende kaminda 30% ta skucha radio, ta mas o ménos 52 mil hende tin ku ta keda repartí den 28 ‘zender’, esaki ta keda repartí den radionan popular ku tin 4 mil hende ta skucha nan, esnan ménos popular ku tin 3 pa 2 mil hende ta skucha i esnan chikí ku tin entre 100 pa 200 hende ta skucha. Ta kon e radionan chikí lo tin ku paga 3 mil florin pa luna. Tin dje radionan aki no ta produsí 36 mil florin pa aña pa paga na belasting. Si dado momentu lo mester hasi esaki tòg, ami ku ta doño di Radio Krioyo tin sufisiente komposishon i lo mi toka kaha di òrgel, músika típiko i bandanan lokal i lag’é bai dal riba bleki manteka numa. Finalmente Darwin Gregg a enfatisá ku radionan tin ku uni i para duru kontra di esaki. E hendenan aki ta hendenan ku mente maligno i mente pa destrukshon. Tin ku krak e den tòm, e bai pensa un otro negoshi pa e hasi. Nos tin basta problema riba e isla aki pa bin un mas aserka.’, Gregg a finalisá bisando.