DAKAR, SENEGAL, AP.- Miéntras mundu tin miedu i atenshon pa e kandelanan den e selva amazóniko di Brasil, imágennan di satélite ta mustra un kantidat muchu mas grandi di kandela den e kontinente afrikano. NASA a bisa ku Afrika ta un “kontinente na kandela”.
Presidente franses Emmanuel Macron a bisa ku e ta konsiderando pa lansa un kampaña internashonal pa yuda paisnan den e zona subsaharan di Afrika pa kombatí e kandela. ekspertonan a bisa ku e situashon na Afrika ta diferente i ku ainda e no ta un problema kresiente, ounke e por bira un peliger den futuro.
Na Angola tabatin kasi tres biaha e kantidat di kandela ku na Brasil, segun imágennan di satélite di NASA, kual ta registrá mas di 6.000 kandela na Angola, mas di 3.000 den Repúblika Demokrátiko di Congo i mas di 2.000 na Brasil.
Ounke Angola i Congo ta e paisnan ku mas kandela, normalmente, esaki sa sosodé riba terenonan kaminda no tin hopi palu i riba kamponan di kultivo di agrikultornan. Dor di esaki, e kandelanan no ta forma un menasa pa Medio Ambiente, segun Sally Archibald, Profesor di Universidat Wits na Johannesburg.
