MERKA.- E edishon dje aña aki di premio Oscar lo por tuma lugá sin un presentadó prinsipal i na su lugá rekurí na un grupo selektá di selebridatnan pa presentá e diferente segmentonan di e anochi di premiashon.
Despues di un luna ku e aktor i komediante Kevin Hart a renunsiá komo presentadó di e premionan di Oscar, e produktonan di e prestigioso galardon tin plan pa laga e puesto bashí i na lugá selekshoná un meskla di aktornan pa hasi e trabou di presentadó durante diferente segmentu di e premiashon.
Si ta asina, anto lo ta promé biaha den 30 aña ku Oscar lo no tin un presentadó prinsipal, meskos ku na 1989 na momentu ku produktornan dje galardon a opta pa no konta ku un presentadó prinsipal, pero presentá e anochi ku vários duo di aktor i aktris.