WILLEMSTAD – Polis di Montaña a sali pa Choloma i pa mas eksakto e área sùit di e bario despues di risibí informashon tokante un kaso di tiramentu den e bario. Na yegada na e sitio, agentenan a konstatá ku tabatin vários indikashon ku bala a ser los den e área.

Dilanti di un kas, riba kaya, polis a haña un total di shete huls di bala. Durante inspekshon di e sitio, a konstatá tambe ku un Kia Forte kòrá tabatin impakto di bala na su glas patras. Den muraya di e kas polis a deskubrí otro impakto di bala. Debí na e esaki, polis a pidi asistensia di personal di TFO i reshèrshe pa presentá na e sitio i realisá un investigashon mas profundo.

Ekiponan di investigashon a eksaminá e área i dokumentá e indikashonnan ku por yuda determiná kon e tiramentu a sosodé. Te na e momentu aki no tin informashon konfirmá tokante persona heridá, ni ta konosí ken a los e balanan òf kiko tabata motibu di e tiramentu. Polis ta sigui investigando e kaso.