WILLEMSTAD.- Parlamentario Gilbert ‘Gibi’ Doran, un dia despues di Festival ‘Un Kanto pa Kòrsou’ a manda un komunikado kaminda e ta hasi un petishon na radio emisoranan i tambe e plantanan di televishon lokal pa nan toka e kansion ganadó di Festival ‘Un Kanto pa Kòrsou’.
“Komo representante di pueblo i spesialmente den e sektor di kultura i edukashon, mi ke a hasi un petishon na radio emisoranan i tambe televishonnan lokal, pa por fabor toka e kansion ganadó di festival Un kanto pa Kòrsou.
Ya ta e di 10 edishon di e festival aki ku a bin ta lanta di nivel tur aña mas, ku kontribushon di nos mihó músikonan i intérpretenan.
Ta hopi esfuerso musikal, tempu i plaka ta keda invertí pa e festival por ta realisabel i e premio di mas grandi lo ta pa e kansion haña e oportunidat pa zona hopi, p'e por penetrá den e pueblo. No ta asina, ku ta e dia di presentashon so e  mester zona, pa despues bai warda.
Mi petishon spesial ta pasó niun aña e kansion ganadó, no ta haña e balor na emisora nan i televishonnan komo kansion ganadó, ‘Un Kanto pa Kòrsou’.
Pues por último, mi ta spera ku mi petishon komo representante di pueblo i di e komishon kultura i edukashon por haña oudiensia”.