Komo medida di prekoushon relashoná ku tormenta tropikal

WILLEMSTAD. - Relashoná ku e desaroyo di tormenta tropikal ku ta pronostiká ku lo pasa mas o ménos na un distansia di 55 kilometer sùit di Kòrsou durante oranan lat di djárason anochi, Gobièrnu di Kòrsou a tuma vários medida di prekoushon. E desishonnan ku a keda tumá a bin despues ku Gobièrnu di Kòrsou tabatin un siklo di reunion ayera ku vários instansia, esaki ta loke ku Promé Minister Gilmar Pisas a duna di konosé.
For di e reunion ei a konkluí ku lo tuma e medidanan manera ku a keda anunsiá. Esaki ta pa duna espasio tambe pa tur hende haña chèns pa prepará pa yegada di e tormenta tropikal ku por sierto lo haña e nòmber Bonnie. Te ku ayera anochi, ainda e sistema no a haña e nòmber ofisial.
Promé Minister Pisas tabatin e enkargo pa anunsiá e medidanan i e medida di mas impaktante tabata e Toke de Keda ku a keda anunsiá. Esaki ta drenta na vigor entrante awe 4 or di atardi te ku un próksimo aviso, ku eksepshon di funshonnan vital pa komunidat. Tur establesimentu ku eksepshon di funshonnan vital mester sera 3 or di atardi awe djárason.
Tur aktividat i eventonan planiá riba 29 i 30 di yüni, mester keda kanselá. Dependé e desaroyonan di wer, lo informá kon ta sigui.
Transporte públiko lo kore te ku 4 or di atardi, miéntras ku lo kita brùg ponton awe 10 or di mainta. Fèrinan lo ta aksesibel te ku 4 or di atardi.