WILLEMSTAD.-  Djaluna awor dia 7 di ougùstùs 2017, Freewinds ta ofresé pueblo di Kòrsou otro konsierto grátis.  Na e okashon aki  lo tin presentashon di dos kantante lokal, den e kaso aki Tony Worrel i  Kadir Snijder.  Ta trata aki di dos kantante ku no tin mester di ningun introdukshon pa loke ta nan presentashon riba e barku.E dos kantantenan lo keda a kompaña pa The Freewinds Band i tambe NGN Brazz. E kombinashon aki ta un garantia pa un show na nivel.

Tony Worrel
Ta trata aki di un tremendo kantante lokal ku tin mas ku 20 aña kantando riba Freewinds. Tony ta un tremendo intérprete, e ta un kantante di vários estilo ku ta yega serka di e públiko.

Kadir Snijder
Kadir no ta un kantante deskonosí aki na Kòrsou. Ku su  tremendo bos báritòn, Kadir lo bai entretené e públiko ku kompañamentu di The Freewinds Band.
Na vários okashon den pasado, Kadir a yega di presentá riba Freewinds ku hopi éksito. E biaha aki, un biaha mas Kadir lo bai tei pa asina ei kanta pa su pueblo.

The Freewinds Band i NGN Brazz

Ta bon pa menshoná, ku durante de presentashon di djaluna awor, lo tin kompañamentu musikal di The Freewinds band enkabesá pa e gran músiko i guitarista Patrick Zaguray i tambe e otro músikonan talentoso di e tremendo banda aki. Tambe lo tei presente NGN Brazz ku ta ser formá pa Norman Kooks ( trompèt), Giovanni Atalita ( trombon) i tambe Norbert Girigorie ( sax)  pa hasi e totalidat pa loke ta trata e kompañamentu musikal.

Entrada grátis

Manera a bira kustumber, entrada pa e konsiertonan ku Freewinds mes ta organisá ta grátis. E show ta kuminsá eksaktamente 8 pm i p’esei nos ta pidi tur hende pa nan tei for di 7:30 pa asina ei nan por subi i presensiá un tremendo show.
Freewinds djaluna awor dia 7 di ougùstùs 2017 lo ta mará na Mathey Werf ku ta keda nèt dilanti di  Luna Blou. Pa bo  keda registrá pa un o mas asiento den e show aki, manda un app na  +59995130837  i bisa kuantu lugá bo tin mester. Tur esnan ku den pasado a yega di bai e shownan riba Freewinds sa kon bon e ambiente aki sa ta. Kòrda manda app i no yama na telefòn, ya ku e telefòn aki no ta risibí yamada, pero si whatsapp. E struktura aki ta funshoná perfektamente.