WILLEMSTAD.- Djamars awor dia 7 di Novèmber, Toni Worrell lo regalá pueblo di Kòrsou i  Fundashon pa Protekshon di Bestia (St. Dierenbescherming) un konsierto magno. Bo kontribushon pa entrada lo ta di sosten pa Fundashon pa Protekshon di Bestia. E konsierto titulá ‘They Need Love Too”, lo tuma lugá abordo di Freewinds, di 20.00-21.30 or. Karchinan ta optenibel serka Stichting Dierenbescherming Curaçao (465-4307), Veeris Pet Center N.V. (868-7917) i serka Toni Worrell (528-2404, 677-6497 o 465-3582) na rason di f 25,- so!
Su presentashon sèptèmber último, komo artista prinsipal den e “Tribute to the Earth Wind and Fire” a laga Kòrsou rekordá ki artista di taya, nos tin den Toni Worrell. Un intérprete ku a biaha mundu  i a kompartí tarima ku grandinan manera Massada, Surinam Music Jazz Ensemble, Golden Earing, Maxi Priest, Ruby Turner, Jacky Graham, Kenny G i asta e desaparesidonan Whitney Houston i George Michael. Vokalista ekstraordinario ku ta dominá tantu pòp, komo Jazz, R&B, Reggae i muchu mas.
Despues di a yega nos isla komo kantante di Jazz, muy pronto Toni Worrel a dediká su mes na pasa su eksperensia pa otronan atraves di su seshonnan di ‘vocal coaching’.
Su skol di músika C.Y.M.F. kaminda e ta hasi esei, ya ta eksistí pa mas di 23 aña i a yuda formá hopi di Kòrsou su kantantenan sélebre. P’esei último tempu su propio aparishonnan riba esenario semper tabata kòrtiku, dunando chèns na esnan bou di su tutela pa lusi. Pero su amor pa bestia a pon’e subi esenario bèk komo artista di pura sangre, pa deleitá pueblo di Kòrsou ku un show di kita sombré i alabes rekoudá fondo pa Fundashon pa Protekshon di Bestia Kòrsou.
“E Fundashon aki mester di tur nos apoyo, pasobra ta hopi ta e bestianan ku ta sufri pa falta di amor i deskuido, riba nos isla. I nunka no tin sufisiente fondo pa e meta noble aki.” Asina Roy ‘Toni’ Worrell, a deklará. “Ami ta un ferviente amante di bestia. Mi tin 7 kachó i semper ta buska pa traha lugá pa un mas, pasobra mi kurason ta bati pa nan! E konsierto aki mester reuní tur ‘lovers’ huntu pa un bon kousa: tantu hendenan enamorá, pa un anochi romántiko den bon ambiente, komo ‘Lovers of Good Music’ i ‘Animal lovers’, pa un anochi inolvidabel. Gosa i yuda alabes”. Akompañamentu musikal ta na enkargo di Freewindsband, figurando tambe Ronle Rouse, Chris Walle i un ‘vocal team,’ (David Koeijer, Gilmar Monte i Gwendoline Worrell-Francisca).
Pues bo no por pèrdè e show espektakular aki, djamars 7 di Novèmber, 8.00 pa 9.30 pm ! Kumpra bo karchi awor mes, pa solamente f 25,- serka St. Dierenbescherming Curaçao (465-4307), Veeris Pet Center N.V. (868-7917) o serka Toni via nr. 528-2404, 677-6497 òf 465-3582. Porta di Freewinds ta habri for di mitar di ocho i show ta kuminsá na ora.