WILLEMSTAD.- Topa mi na Hòfi di Flor ta título di e ‘semi unplugged session’ ku Crisèn Schorea i su banda 8.40 ta presentá djabièrnè, 15 di desèmber próksimo pa 8’or di anochi na Landhuis Bloemhof.
Durante di un anochi íntimo i ameno Crisèn lo deleitá bo ku diferente piesa skibí i kantá pa su persona. Piesanan manera ‘Súplika di Namorada’,  su promé ‘single’ ku ya pa algun siman ta zonando na diferente radio emisora.  Tambe Crisèn lo kompartí ku bo su poemanan saká for di entre otro su buki di poema ‘Sinti mi Sinti’.
Tur amante di músika, poema i kuminda pa pensamentu na papiamentu ta keda kordialmente invitá pa topa Crisèn na Hòfi di Flor.  Karchinan ta disponibel na Mensing’s Caminada.