WILLEMSTAD.- Un sala yen di karanan sonriente i miradanan intenso siguiendo presentashon di Crisèn Schorea, ta loke bo por a eksperensia djabièrnè 15 di desèmber último na ‘Topa mi na Hòfi di Flor: Crisèn Unplugged’.
Durante di un anochi íntimo i ameno na Landhuis Bloemhof (Hòfi di Flor), Crisèn a presentá diferente poema di su buki ‘Sinti mi Sintí’ pero tambe otro poemanan ku el a skibi den 2017 manera ‘Ki dia’, un poema den kua (ruina di) Sentro Pro Arte ta na palabra. Tambe Crisèn i su banda 8.40 a deleitá e públiko ku diferente di su piesanan di kua ‘Súplika di namorada’ i ‘Desahogo’ ya ta zonando na diferente radio.
Dos ora largu tur presente a risibí kuminda pa pensamentu den un bachi di rima, ritmo i kreatividat na Papiamentu. ‘Topa mi na Hòfi di Flor’ tabata e último presentashon di Crisèn ku su banda pa 2017.