WILLEMSTAD.- Manera ta konosí Torneo Kenley Jansen ta ranka sali mayan, djabièrnè 6 di yanüari, ku apertura ofisial pa 6’or di atardi na Suvek. E torneo aki ta dediká na Joseluis ‘Filo’ Felomina, un persona ku pa hopi aña kaba a bin ta dediká su mes na entrenamentu di hóbennan pelotero.

Filo mes a kuminsá hunga beisbòl den hubenil ku e ekipo di Coco Rico ku tabata bou di maneho di e legendario Tonchi Martina. Despues el a bai Klase A ku J&B ku despues a bira AGT/CPA ku tabatin Gachi Thielman na kabes.

Despues ku su karera komo pelotero, Filo a bai yuda na Akademia di Beisbòl Brievengat huntu ku Ernst Meyer. Esei tabata na aña 1996 i a kuminsá komo coach den Senior League.  Einan tabata huntu ku Gershwin Meyer i Sra. Roosje. El a yuda tambe den Little League i a forma parti di vários selekshon nashonal komo coach.

Filo a keda na Brievengat pa 11 aña i ya kaba el a kuminsá ku train algun hóben apart pa prepará nan mas mihó pa nan desaroyo individual komo pelotero, pa prepará nan pa selekshon, tambe pa ora nan bai afó komo studiante atleta òf keda firma komo profeshonal.

Renfred Jansen tabata e promé hóben ku Filo a kuminsá train apart i despues di 11 aña na ABB, Filo a pasa pa Marchena i tabata train su hóbennan apart na Vi Jansen. Despues di Marchena, Filo a dediká su mes na train i prepará e hóbennan èkstra. Hopi ta esnan ku a pasa serka Filo, entre otro Quincy Ascencion, Kenley Jansen, Brian Engelhardt, Micky Trinidad, Edinho Meyer, Wencho Schoop, Juan Carlos Sulbaran i asina por sigui menshoná hopi mas.

Despues Filo tabata yuda tambe na Dutch Caribbean Beisbol Academy ku tabata train na Tio Daou huntu ku entre otro Payo Faneyte i Ben Thijssen.

Tabata na desèmber di 2007 ku Jesus ‘Chu’ Halabi a aserká Filo pa bira scout di Texas Rangers aki na Kòrsou.  Aki un relashon a nase i sigui krese te dia awe i ku Filo ta konsiderá ‘Chu’ komo su mentor.

Un di e peloteronan ku Filo a train for di prinsipio tabata Jurickson Profar ku tabata keda konsiderá komo prospekto number 1 di MLB i awor ta den Liga Grandi. Jurickson huntu ku Chris Garia a bira e promé prospektonan ku el a firma i esei tabata  dia 2 di yüli 2010.  Dos aña despues Rangers a firma Juremi Profar ku tambe tabata train serka Filo.

Joseluis ‘Filo’ Felomina semper tabata kere den e filosofia ku disiplina ta bin na promé lugá. “Ser bon hende ta mas importante ku ser un bon deportista. Beisbòl ta kos di un ratu i disiplina tei pa semper di bo bida,” asina el a finalisá bisando.