WILLEMSTAD.- Djabièrnè 6 di yanüari ta marka otro logro históriko pa loke ta e torneo di beisbòl Little League pretemporada, konosí komo Torneo Kenley Jansen ora ku esaki alkansá su di 20 edishon.

Fundashon Akademia Baseball Brievengat ta di hubileo ku e di 20 aniversario. Riba un djasabra mainta pa ta mas eksakto 11 di yanüari 1997, 20 aña pasa a kuminsá ku un torneo di ‘warm-up’ riba tereno di e tempu ei Rising Trotters mihó konosí komo tereno Sam Buting. Un inisiativa ku a sali for di algun miembro i direktiva i mesora a bira e pionero pa loke ta torneo nan pa Little League.

Atraves di añanan míles di nos hóbennan pelotero a hunga den e torneo aki. Un di e poko oportunidat e tempu ei den kual ekiponan di e diferente liganan por midi forsa kontra otro i sirbi tambe komo un 'warm-up' promé ku temporada regular di e respektivo liga inisiá.

Manera por imaginá un kantidat di e aktual profeshonalnan a kuminsá nan karera di beisbòl hungando den e torneo aki. Nòmbernan manera Kenley Jansen, Jonathan Schoop, Mariekson Gregorius, Andrelton Simmons, Jurickson Profar i hopi mas.

Un torneo ku a tuma lugá for di 1997 te ku 2011 bou di nòmber di Torneo Andruw Jones.

For di 2012 e torneo aki a keda denominá komo Torneo Kenley Jansen. E torneo di e aña aki ta dediká na Jose Luis ‘Filo’ Felomina kende tabata entrenadó na ABB pa 11 aña. Despues el a bira konosí pa train hóbennan separá pa prepará esakinan pa un karera profeshonal, pero tambe pa skol komo studiante/atleta. Filo ta skout di e organisashon di Texas Rangers i ta responsabel pa e firmanan di Jurickson Profar, Chris Garia i Juremy Profar. Na vários okashon e tabata manager/coach di nos selekshon nashonal.

Ganadónan

Pa loke ta e torneo den e kategoria di Little e último 19 kampionnan tabata:

1997 Marchena

1998 Sta. Maria

1999 Sta. Maria

2000 Marchena

2001 Brievengat

2002 Marchena

2003 Sta. Maria

2004 Kanselá pa hopi áwaseru

2005 Marchena

2006 Groot Kwartier

2007 Marchena

2008 Sta. Maria

2009 Sta. Maria

2010 Trai Seru

2011 Aruba

2012 Sta. Rosa

2013 Sta. Maria

2014 Marchena

2015 Van Engelen

2016 Trai Seru

Curoil lo ta e spònser prinsipal dje di 20 edishon di e torneo aki ku ta ranka sali djabièrnè 6 di yanüari pa 18:30 pm na Suvek.

E aña aki pa promé biaha lo tin un organisashon for di Birmingham ku lo bin Kòrsou pa kompetí den e parti final di e torneo.

Meskos ku añanan anterior for di Aruba ya a drenta e konfirmashon ku dos ekipo di Little i Minor kualnan lo ta presente pa e buèlta final.

E torneo aki tur aña ta hala kantidat grandi di públiko i semper ku un bon ambiente. E BBQ sukulento tambe ta un di karakterístikanan bon konosí di e Torneo Kenley Jansen.

Akademia Baseball Brievengat un biaha mas ta yama danki na e spònser Curoil.