Víktima di aksidente tráfiko a fayesé awe

ORANJESTAD.-Polis di Aruba ta informá ku un ratu pasa a drenta informashon ku e víktima di un aksidente di Tráfiko a fayesé. Esei ta nifiká ku Aruba a yega morto number 6, den Tráfiko insigur, pa 2025.

Ta asina ku djaluna dia 29 sèptèmber último, pa 9:30 di mainta, sentral di polis a haña notifikashon di un aksidente ku a tuma lugá na e rotònde di Wilheminastraat, na altura di Elmar.

E aksidente tabata entre un outo di famia i un step. Sentral di Polis a dirigí un patruya polisial pa e sitio i na yegada a bin topa ku un outo i un step na unda a pidi ambulans pa e víktima ku ta un hende hòmber riba  e “step”. Ambulans ku a presentá na e sitio a brinda asistensia médiko i a stabilisá e víktima pa despues transport’é pa hospital.

Despues Sentral di Polis a keda notifiká pa personal di hospital ku e víktima su situashon ta kritiko. Manera indiká ariba, awe djárason pa 6'or di atardi Dr. te Velden a konstatá morto di e víktima di e aksidente. Ta trata aki di e víktima, hende hòmber Jorge Enrique Lora Diaz nase 1 aprel 1969 (56 aña) na Colombia. Ku e víktima aki Tráfiko insigur di Aruba a yega di 6 morto pa aña 2025. Kuerpo Polisial ta manda palabra di profundo kondolensia na famia.