Trahe nashonal di Kòrsou pa Miss Universe

WILLEMSTAD.- E trahe nashonal ku Chantal Wiertz lo presentá durante di e kompetensia di trahe nashonal di Miss Universe lo ta un homenahe na Margareth Abraham, nos héroe nashonal.

Aña pasa, 2 di mei 2020, nos a rekordá e di 50 aniversario dje tragedia kaminda Margareth Abraham, komo stewardess a pèrdè su bida. Riba 2 di mei 1970, buelo LM 980 a sali airport JFK na New York ku destinashon Princess Juliana International Airport na St. Maarten.

Debí na kondishon malu di wer e avion no por a baha na St. Maarten mesora i disidí di bai San Juan, Puerto Rico. Pero mirando ku e wer a drecha a bolbe traha pa baha e avion na St. Maarten. Despues di algun intento, gasolin a kaba i nan tabata forsa pa baha e avion den laman ku a resultá den 23 morto i 40 sobrebibiente. Durante dje aterisahe riba laman Margareth a aktua segun e protokòl ku ela siña, pone bida di otro promé ku di bo, yudando e pasaheronan pa bandoná e avion. Durante dje proseso aki ela fayesé komo un berdadero héroe.

Gobièrnu di Antia Hulandes a honra Margareth Aleida Abraham dor di nombra e plaza na Curaçao International Airport na su nòmber. Presidente Richard Nixon tambe a rekonosé i a presentá e famia i gerensia di ALM ku un plakat ku ainda ta pega na muraya di Curacao International Airport.

Den un homenahe póstumo, Rei Willem Alexander a otorgá Margareth Abraham un medaya di honor pa ‘Yudansa Humanitario’. E medaya ta keda otorgá na personanan ku a hasi un akto di karidat ku ta kontené kurashi i sakrifisio propio.

Gionel Virginie a traha e konsepto di e trahe nashonal di Miss Kòrsou, Juan Carlos Padrino Rondon a diseñá i konfekshona e trahe i Giovanni Abath a traha e maleta.

Sertamen di Miss Universe 2020, 69 edishon, ta tuma lugá riba djadumingu, 16 di mei 2021 na Hollywood, Florida.