MERKA.- Shete di e trahenan mas sobresaliente di Britney Spears ta na benta riba eBay. Ta trata di trahenan ku e kantante a usa den videoclip di ‘Slave 4 U’ i ‘ Me against the Music’.
Tin mas ku 188 hende ku a ‘bèt’ riba e kolekshon di trahenan. E bèt mas haltu te ku ayera tabata 99.995 dòler. Tur e trahenan lo keda kompañá pa un sertifikado di outencidat.
E doño di e trahenan a indiká ku ta atraves di tempu el a kolekshoná e trahenan. For di 2003 Spears mes ta bendiendo su trahenan.
No ta promé biaha ku trahenan di selebridatnan ta keda pone na findishi riba website di empresanan ku ta ofresé e servisio di findishi online.
Resientemente un trahe ku Marilyn Monroe a bisti, pa a kanta ‘happy birthday’ pa presidente John F. Kennedy, a keda bend’e na findishi pa e montante rekòr di 4.8 mion dòler. Esnan interesá den kumpra e trahenan di Britney tin chèns te ku mañan djabièrnè pa hasi un proposishon.