WILLEMSTAD.-Tur kos ta kanando segun plan pa “Bin, Bula’den” di Lions Club. E fiesta di karnaval ta tuma lugá djasabra awor dia 3 di febrüari na Fort Nassau. A kuminsá ku e parti di set up kaba i mester bisa ku nos a bai tira un bista na e training di Randal Corsen i su orkesta i… nan ta preparando un show ekstraordinario pa djasabra awor. E ambiente ta kuminsá for di 9’or di anochi ku presentashon di DJ Boogieman i ERA, e reinan di ambiente.
Kantantenan ku ta bai tembla Fort Nassau huntu ku Randal Corsen i su orkesta ta Dibo D, Rich Pieter, Yumarya Grijt i highlight di e anochi ta Sidney ‘Mr. Saab’ Isidora. Nos Rei di Tumba  Urvin ‘Luwi’ Yano tambe lo ta sende sende na e fiesta di Lions.
E fiesta di karnaval ta kosta 250 florin i ta inkluí kuminda i bibida ilimitá. Manera ta e kaso ku añanan anterior bon ambiente ta garantisá. Bar i kushina ta bon surti i ta na enkargo di The Trader. Karchinan ta optenibel na Mensing’s Caminada i serka miembronan di Lions Club. Sosionan di ACU por kumpra nan karchi na e preis redusí di 225 florin na The Trader na WTC. Tur fondo rekoudá ku e fiesta di karnaval aki ta bai pa e klup por kontinuá ku e diferente trabounan karitativo ku e ta hasiendo.
Ta hasi un petishon na tur bishitante di fiesta pa sigui instrukshon di e miembronan di seguridat pa garantisá ku tur kos ta kana bon. Por parker na Deloitte, dilanti UTS, TeleCuraçao, Birgen di Arrarat i Ennia. Lo tin transporte di bus for di tur e diferente puntonan aki pa Fort Nassau.
Pa mas informashon bishitá e Facebook page di Curaçao Lions Club. Por yama tambe na 529-9906 òf 560-2291.
Riba potrèt por mira momento ku Randal Corsen kompaña pa Dibo D, Rich Pieter, Yumarya Grijt i Sidney ‘Mr. Saab’ Isidora a tuma un break di nan training pa saka un potrèt pa nos.