WILLEMSTAD.- Djadumingu último a tuma lugá den Hòfi Fidel e selebrashon di 30 aniversario di ‘Arnell i su Orkesta’.

E selebrashon a kuminsá for di 12’or di mèrdia i a bai terminá anochi. Fanátikonan dje banda a bin na kantidat i dansflur a keda yen na momentu ku e banda a presentá.

Huntu ku nan a presentá tambe Típiko Pasa Bon, Kaha di Òrgel di Winchi Martha, Dj Chio, Karimbo, SP i XD.

Ta pendiente awor pa e banda organisá un fiesta kaminda nan lo bai duna homenahe na tur e músikonan ku a forma parti dje banda.