WILLEMSTAD.- Djasabra atardi, riba inisiativa di minister Hensley Koeiman, a tuma lugá un enkuentro sosial durante kua Reina Elia i mayoria Reinan di Tumba a bini huntu, pa den un ambiente relahá topa otro despues di un periodo durante kua a selebrá 50 aña festival di Tumba di Kòrsou.
E enkuentro ku tabata planiá pa tuma lugá di 11.30 pa 1.30 tabata asina ameno ku e último invitadonan a bai kas 7 or di anochi. A titulá e enkuentro komo un almuerso di guiambo, komo esaki tabata e plato prinsipal ku anfitrion Wilfrido Christina a ofresé na nos baluartenan di Tumba.
Invitadonan spesial tabata Emperador di Tumba, Anselmus ‘Boy’ Dap, presidente di AMAK, Manfred ‘Feko’ Gomes i Pedro ‘Hermanito’ Narvaez. Ousente, ku aviso, tabata Rei di Tumba 2020, Raey Lauffeur (ku ta den estranheria pa un vakashon bon meresí), Richinel ‘Babalu’  Kirindongo (ku ta biba den estranheria), Izaline Calister ku ta riba gira na Hulanda i Hendrik de Windt (pa motibunan privá).
Minister Koeiman, kende a organisá e enkuentro, un biaha mas, a ekspresá e apresio ku e tin pa nos artistanan. “E don ku Dios a duna kada un di e artistanan aki ta di un balor masha grandi pa desaroyo sosial riba nos dushi pais. Ami semper ta bisa ku pa medio di nan kreatividat nan por tin un influensia grandi riba bienestar di nos komunidat. Den e kaso spesífiko di Festival di Tumba, atraves di 50 aña, esaki a ser suprayá,” segun minister Koeiman.