WILLEMSTAD.- “Mas Alabansa Total”  ta un programa  edukativo, sosial i spiritual kual su meta ta pa  motivá, enkurashá i yuda enrikesé e bida di e oyente pa e tin un tremendo dia. Radio Mas 99  riba su frekuensia 99.7 FM  ta transmití e programa aki di djaluna pa djabièrnè di 6’or pa 7’or di mainta.

“Mas Alabansa Total” ta selebrando  su di promé aña  presentá dor di e hóben, Darwin Borgschot, i ta organisando su promé konsierto di gospel titulá “Gratitut” ku e meta pa invitá su oyentenan pa bin disfrutá di e anochi  i pa sera konosí i interkambiá ku e produktornan.

E tremendo konsierto aki ku partisipashon di diferente kantante, e.o. grupo T.R.U.E, Liesella Thomas,  Shamiro Anita, Angelique Klooster i Grace Mass Choir ku lo deleitá kada un ku bon músika gospel, ta djadumingu 3 di sèptèmber for di 7:30 pa 11:00  di anochi, na iglesia Grasia Abundante na  Zuikertuintje.

E programa “Mas Alabansa Total” tin sintonia total via di Internet na Ulanda, i e produktornan di e talk show “Talk That” ken tambe ta traha huntu ku RTV7  a aserká e presentadó di e programa pasobra nan ke biaha pa Kòrsou pa hasi un reportahe di e trabou ku e ta ehersé, e aporte ku e programa ta ofresé na e komunidat, i tambe nan kier ta na Kòrsou pa eksperensiá e konsierto.

Karchinan ta optenibel na 24 uur uit de Muur,  Mensing’s Caminada,  Tik Tak, Philos Gifts and Books den plasa Nobo Unit 5,  Kas di Beibel  i na Radio Mas 99.7 FM Pa mas informashon di e konsierto i su meta por yama 675-2695, 789-8823 òf  515-8283. Un “Mas Alabansa Total” ku ningun hende mag pèrdè.