WILLEMSTAD.- E konsierto ‘Mama pa Semper’ a resultá un tremendo konsierto, esaki tantu na presentashon musikal komo na asistensia di públiko. For di djasabra a bira konosí ku e konsierto aki ta ‘sold out’ i ayera nochi e presentashon musikal di Randal i orkesta, e kuarteto di fió, Chin Behilia, Gibi Doran, Grupo Serenada i Dibo Doran a pèrkurá pa e públiko pasa un anochi plasentero. E repertorio ku a keda skoh’é tabata tremendo, e oportunidat pa bolbe mira un presentashon di Chin Behilia, un di nos leyendanan musikal i e chèns úniko pa por a mira Gibi i Dibo huntu riba tarima tabata e chèri riba e bolo. Grupo Serenada un biaha mas a demostrá nan kalidat musikal i e kompañamentu di tantu Gibi komo Dibo tabata sublime. ‘Mama pa Semper’ un konsepto pa Dia di Mama ku ta bal un ripitishon otro aña.