WILLEMSTAD.- Ayera nochi a tuma lugá na Casa Moderna den Madurostraat Punda un enkuentro ku pueblo di Kòrsou kaminda e sineastanan lokal, Anton de Bies i Sulin Passial a duna informashon relashoná ku nan proyekto sinematográfiko ‘ Ku Amor pa Kòrsou’.
'Ku Amor Pa Kòrsou' ta trata entre otro emansipashon kultural di nos isla i influensia di nos idioma papiamentu riba pueblo di Kòrsou. Tur esaki inspirá pa e bida di Hemayel Martina. E hóben poeta ku tabata stima su isla mas ku nada. Lástimamente el a fayesé nèt na momento ku el a kuminsá bira konosí na Kòrsou.
Ku e pelíkula aki e sineastanan ke trata pa empoderá e siguiente generashon di Kòrsou ta buska nan forsa den nan mes i e sintimentu di orguyo den nos historia, kultura i idioma di nos Pais ku ta ofresé muchu mas ku playanan bunita i subida di solo impreshonante.
Na di dos lugá, nos mester ta konsiente dje echo ku e desaroyo di Kòrsou ta simbolisá e emansipashon kultural ku tantu pais rònt mundu, pero spesialmente den Karibe, mester a pasa aden despues di deskolonisashon. P’esei e pelíkula aki no ta konta e historia di Hemayel, pero tambe e historia di kon kada un di nos ta i ku loke nos por.
Pa mas informashon riba e proyekto por bishita e wèpsait: www.amorpakorsou.com