WILLEMSTAD.- Resientemente Sentro di Bario Muizenberg a bira realidat kaminda un grupo di habitante a pone skoudernan huntu i pa asina bai na revitalisá e bida den e bario di Muizenberg bieu. Nan mishon ta pa ban duna bida bèk den e bario i tambe alsa e nivel di bida sosial den bario.
Un di e aktividatnan ku ta bai ta algu sumamente relahante den e sentro di bario ta un tremendo fiesta den oranan di atardi riba djadumingu awor 6 di mei. E direktiva di e sentro di bario a skucha di hopi hende kiko lo ta un tremendo aktividat pa e abitantenan i tambe pa pueblo di Kòrsou por disfrutá di dje riba djadumingu atardi mirando ku e ambiente den e oranan ei ta ketu.
Ideanan a keda lansá i nan a kumbiní pa un tremendo fiesta di reflection kombiná ku algu di kòmbèk. Pa yega na un eskoho di bon músika di reflection e invitashon a bai pa e 3 mihó konosedónan di reflection kada unu ku nan époka kende nan ta Dj. Ramiro di Radio MAS, Cali Manuel di Radio Direct i Angelo Virginie di Radio Hoyer. Tur tres fuerte mes den e ámbito di reflection i nan tur tres tin un grupo di fanátiko ku ta sigui nan kada un durante nan programanan di reflection.
Djadumingu awor 6 di mei di 5’or di atardi pa 11’or di anochi e 3 titannan aki ta bai trese e mihó ambiente pa abo ku tin hopi tempu sin sali i gosa di un dushi aktividat pa bo bin balia i disfrutá di e mihó kansionnan di añanan 60 i 70 i ku un poko 80.
Dj. Ramiro lo lòs algu di kòmbèk tambe den su repertorio ku ta kombiná ku reflection, miéntras tantu Cali komo Angelo ta konsentrá riba e reflectionnan. Kos tei bira bon pasobra preisnan ta na nivel di tur saku. Solamente 10 florin pa entrada i abitantenan di Muizenberg manera Brokopondostraat, Deltastraat, Medema Park etc. ta paga 5 florin basta nan kumpra nan karchi tur dia entre 6’or di atardi pa 7’or di anochi na Buurtcentrum Muizenberg ku ta keda na Deltastraat.
E buurtcentrum ta un sitio konosí pa esnan ku den pasado a yega di bishitá e Diskoteka Between na Deltastraat. E sitio ei a bira awor Sentro di bario Muizenberg. Pues wak pa bo tei pasobra ta ambiente di hende dushi i desente pa hende nèchi disfrutá ora Ramiro, Cali i Angelo sakudí Muizenberg bieu ku nan tremendo eskoho di bon músika, djadumingu awor 6 di mei.