ORANJESTAD.- Awe mardugá a sosodé un aksidente di tráfiko hopi serio na Aruba. Informashon ofisial di polis di Aruba ta indiká ku awe mardugá pa mas o ménos 03:23 am sentral di polis a haña un yamada pa atendé un aksidente hopi grave na Shaba na altura di Sun Shade Optica. Na yegada di patruya el a pidi pa ambulans mesora mirando e situashon di e dos víktimanan na e lugá di e aksidente. Loke por a komprondé ta ku e outo Nissan Sentra blou biniendo di direkshon zùit lo mester a krusa na momento ku un motersaikel hayabusa kolo blanku tabata bayendo direkshon di nort. E impakto tabata hopi fuerte, di tal forma ku e shofùr di outo  a keda den e outo i e pasahero a keda riba kaminda huntu ku shofùr di e motersaikel. Ambulans a yega na e sitio i no por hasi nada pa e dos víktimanan ku tabata riba kaminda.

Di 3 i di 4 morto

A pidi spesialista di tráfiko tambe BFTO, slachtofferhulp i tambe brantwer a presentá pa duna un man.  Dr. Texeir a yega na e sitio di e aksidente i a konstatá morto pa 4’or di mardugá di  e víktimanan. Ta trata di Wendell A.R. de LEEUW nase 25 desèmber 1995 na Aruba i Dyllon A. LOURENS ( shofùr di e motersaikel) nase 1 òktober 1995 na Aruba. Ambulans a bai ku shofùr di e Nissan ku urgensia pa hospital. Te awó su situashon ta kritiko. Di e forma aki Aruba a konosé su di 3 i di 4 morto den tráfiko.