MERKA.- Apesar dje resien vershonnan ku ta sigurá ku Khloe Kardashian lo ta pensando pa duna e tata di su yu, True, un oportunidat nobo pa ku nan relashon, ta parse ku e situashon ku Tristan Thompson no ta masha di kanta makamba.
Apesar ku e strea di e serie ‘Keeping Up with the Kardashian’ ainda ta bibando den e kas dje hungadó di NBA, ta parse ku Khloe ta desesperá pa regresá Los Angeles pa e ta huntu ku su famia.
Tristan no ta bibando ku Khloe i su yu den e kas na Cleveland. Ounke ku kontinuamente e ta bishitá e yu, e dos mayornan ta mantené nan interakshon na lo mínimo.
Otro fuente a konfirmá ku e ambiente entre e mayornan di True ta bayendo di malu pa pió, e úniko kos ku ta pone ku Khloe no a bai Los Angeles ainda ta e aprobashon di su dòkter.
Loke lo mester a bira e momentu di mas felis den e bida di e empresario, a kombertí su mes den un desepshon di amor. Faltando masha tiki pa e beibi a nase un kantidat di video a keda publiká riba retnan sosial ku a laga un monton di prueba di infidelidat di Thompson, kende ta permanesé den un silensio hermétiko riba e kontroversia ku el a generá ku su akshonnan.