MOSCOW, AP.- Presidente merikano Donald Trump lo no biaha pa Moscow pa selebrashon di Dia di Viktoria riba 9 di mei. Asina Kas Blanku a anunsiá djamars.
Kas Blanku a konfirmá ku Trump a ninga e invitashon di Kremlin pa presensiá e desfile di 75 aniversario di e viktoria di Segundo Guera Mundial, e dia di mas importante di Rusia.
Trump a bisa aña pasá ku e ta apresiá a invitashon pero ku posiblemente e lo no por partisipá dor ku e selebrashon ta “meimei di e temporada polítiko”.
E bosero di Kremlin Dimitri Pskov a deklará djamars ku e “informashon indikando ku e presidente lo no partisipá a yega via kanalnan diplomátiko”. El a agregá ku no tin informashon si un hende lo representá Merka den e selebrashon aki.
Desde e era soviétiko, Dia di Viktoria ta un selebrashon importante na Rusia. Outoridat ruso a bisa ku e kantidat total di morto durante Guera Mundial den e pais tabata 27 mion i algun persona ta indiká ku e sifra aki ta muchu mas haltu.
E desfile lo inkluí 14.000 sòldat i 300 vehíkulo militar.
Funshonarionan di Kas Blanku i aliadonan di Trump ta teme ku un biahe pa Moscow durante e aña elektoral por resultá dañino polítikamente, sosteniendo akusashon di e demókratanan ku ta bisa ku e presidente no a kondená e interferensia ruso den elekshon i e invashon di Ukrania.
