WASHINGTON, AP.- Presidente Donald Trump ta aktuando komo e kandidato faborito den elekshon di djamars awor. Pa su mes persona, e ta esun di mas mihó, sin tene na kuenta ku e restu di su presidensia di kuater aña ta na riesgo.
Kas Blanku di Trump ta enfrentá un situashon difísil i desafionan grandi ku elekshon di medio mandato. E gobièrnu di Trump ta enfrentá vários investigashon i un stankamentu partidista.
Trump ta enfrentá konsekuensianan potensialmente debilitante den kaso ku e republikanonan pèrdè kontròl di un òf ámbos kámara den Kongreso, kual lo pone fin na dos aña di supremasia republikano na Washington.
Si e republikanonan mantené kontròl di Kámara i Senado, esaki lo ta un viktoria tantu pa e republikanonan komo pa e validashon di e polítika di Trump i su presidensia.
E asesornan di Kas Blanku ta insistí ku e presidente no a pasa hopi tempu kontemplando un posibel derota, pero a kuminsá purba kalibrá ekspektativanan.
Trump a bisa na AP luna pasá ku no ta su falta si e partido demókrata logra haña kontròl di Kámara di Representante.
Durante un spich na Virginia, Trump a minimisá e posibilidat pa e demókratanan tuma kontròl di kámara di representante. “E por pasa”, asina el a bisa, pero a agregá “no preokupá. Mi lo enkargá di esaki”.
