WASHINGTON, AP.- Presidente Donald Trump a indiká djárason ku e lo no entregá su deklarashonnan di impuesto na Kongreso apesar di e tempu límite fihá pa un komishon legislativo. El a indiká ku su finansanan ta wòrdu ouditá.
“Mi no ta bai hasié”, asina Trump a bisa na reporteronan na Kas Blanku.
“Mi kier duna nan, pero mi no por hasié miéntras nan ta wòrdu ouditá”. Merka no tin regla pa prohibí un individual pa revelá su deklarashonnan di impuesto miéntras nan ta wòrdu ouditá.
E legislador demókrata, Richard Neal, di kámara di Representante, a pidi IRS pa entrega seis aña di Trump su deklarashonnan di impuesto. Trump a kibra ku vários dékada di tradishon dor di no hasi su deklarashonnan di forma boluntario, manera tur mandatario resien a hasi.
E Sekretario di Finansa, Steven Mnuchin, kende ta supervisá IRS a bisa ku lo kumpli ku Neal su tempu límite, pero no a indiká si a entregá e deklarashonnan manera el a pidi.
E demókratanan ta kere ku e departamento lo no kumpli.
E solisitut pa e deklarashonnan di impuesto di Trump ta un di e vários esfuersonan lansa pa e demókratanan. Neal a usa un lei indikando ku IRS ta obligá na entrega kualkier dokumento di impuesto rekerí pa presidentenan di komiténan klave den Kongreso.
