NEW YORK, USA (AFP).- E eks-presidente Donald Trump a disidí pa no ta testigu den su kaso na New York pa falsifikashon di informashonnan di akountent. Ayera a konkluí e etapa di testimonionan i ta aserkando un veredikto.
Despues di sinku siman, 19 testimonio, algun shen dokumento i te asta deklarashonnan di kontenido seksual, e promé kaso penal kontra un eks-presidente di Merka ta yegando na su kulminashon.
“Mi ta kere ku a hinka un gran kaso den otro… pero awor mester deskartá esaki i te asta promé ku yega na un veredikto”, segun Trump a bisa ayera.
“Ta hopi tristu. Pero e bon notisia ta ku no a proba nada. No tin delito”, segun e republikano.
E hues Juan Merchan a anunsiá ku kulminando otro siman lo e pasa den e deklarashonnan final i ku lo kuminsá e deliberashon dje ‘jury’.
“Djamars (próksimo) lo skucha e puntonan di defensa i fiskal, i mi ta spera ku e siguiente dia e huradonan por kuminsá deliberá”, segun e hues.
E hurado mester disidí si Trump ta kulpabel di 34 falsifikashon di sifra relashoná ku e pago di 130.000 dollar na e eks-atris porno Stormy Daniels, pa kumpra su silensio i evitá un posibel skandal seksual na fin dje kampaña presidensial di 2016.
E aktris, kende su nòmber real ta Stephanie Cliford, ta bisa di tabatin relashon seksual ku Trump den 2006, tempu ku ya e tabata kasá ku su aktual kasá Melania. Donald Trump ta nenga esei.
Promé ku e kaso a kuminsá, dia 14 di aprel, Trump a bisa ku sin duda lo e duna deklarashon pa “bisa e bèrdat”. Pero finalmente e no a hasi esei, manera ekspertonan a premirá, evitando un posibel interogatorio hopi profundo di fiskalnan.
