WASHINGTON.- Kada bes ku Donald Trump ser di dagfar, i esei ta algu ku a sosodé kuater biaha kaba for di luna di mart, e ta usa esaki pa rekoudá plaka pa finansiá su kampaña i pa kolmo e ta haña atenshon den e enkuestanan públiko. Na lugá di e situashon aki hasi daño na e èks presidente su imágen, su problemanan legal ta dunando e mas popularidat i ta un balor polítiko agregá, den un pais unda pa bo bira presidente i drenta Kas Blanku e ta kosta bo algun bion dòler.
Djadumingu último asta promé ku e kargonan a ser formalisá i ku nan a bai ofisialmente pa su persona, el a saka un e-mail pa su simpatisantenan pidiendo nan pa lucha bèk i bai den nan pòtmòni. El a pidi su siguidónan pa hasi donashon di entre $25 – $1.000. Trump ta konsiderá e loke ku ta sosodiendo aki komo un persekushon polítiko kontra su persona.
Pero mester rekonosé ku te asina leu e strategia aki ta dunando resultado ya ku e tim di kampaña di Partido Republikano a anunsiá ku nan a risibí mas ku $4 mion den 24 ora despues di su promé dagfar na New York na luna di mart. Tambe Trump a haña kasi $7 mion despues ku el a ser akusá den korte federal na Florida na yüni pa motibu di a saka dokumentonan klasifiká.
