WILLEMSTAD.- Algun siman atras popular artista lokal TSeaN a biaha pa Los Angeles, California pa realisá grabashon di e kansion i videoclip titulá “Sorry”. Durante di e último añanan e kantante a bin ta skirbi i ko-produsí diferente hit birando un kantante estelar den kualke kombinashon.
Pa Decoded e kolaborashon ku TSeaN ta nifiká ku a sigui traha duru i ekspanshon di e portofolio pa otro géneronan musikal a keda un meta pa e kas di produkshon. E akuerdo ku TSeaN a keda konkretisá na LA i ta enserá un proyekto di largu plaso i ta inkluí e.o ku tur kontratashon di artista lo keda manehá pa Decoded.
“Sorry” ta djis e promé kansion di TSeaN ku e kas di produkshon. Ta pendiente pa e EP titulá 'Drechi' ku lo keda lansá den luna di Desèmber próksimo.
Promé di Kòrsou pa graba na Westlake Studios
E videoclip a wòrdu produsí dor di Greyan Pastor na 4 sitio na LA miéntras ku e kansion a wòrdu grabá  dor di ingeniero Sean Cannister na Westlake Studios i mesklá dor di Efrem Mambi. Westlake Studios tin historia profundo; tur artista grandi a yega di- òf ta graba einan. Westlake Studios ta kaminda p.e Michael Jackson a graba Thriller i Billie Jean i awe, esei ta eksaktamente kaminda ku TSeaN a graba ''Sorry''.
E videoclip a keda estrená siman pasá riba kanal di YouTube di @decodedofficial i ya ta konta ku riba 84 mil views den un siman di tempu, generando riba 6 mil views pa dia. Riba su mes, esaki ta un rèkòrt. Greyan Pastor mes tambe komo direktor kreativo a bin ta hasi algun grabashon ku sigur ta paréntesis.
‘Sòri’ ta mas ku un palabra...
E kansion produsí pa Derrel ‘Titi’ De Palm sigur meresé un lugá haltu den bo kansionnan faborito. E ta relatá un historia di amor, na unda ku e kabayero ta infiel. Despues di rekapasitashon e kabayero ta pidi sòri i ta kontinuá su rogo di amor ku un sin fin di promesa. TSeaN semper a puntra su mes na vários okashon si el a yega di pidi sòri, òf kon difísil e ta pa pidi sòri, i esei ta loke a yud’é tambe den e parti di skibimentu di e piesa.
E outo -análisis i inspirashon tin un nifikashon personal pa e kantante. Fanátikonan por sigui @TSeaN riba Facebook/Instagram.
Tokante Decoded
Decoded ta un kas di produkshon lokal, ku mira internashonal. Desde su lansamentu e meta prinsipal tabata pa duna oportunidatnan internashonal na artistanan lokal i krea un brùg pa farándula lokal por profilá internashonalmente. Aktualmente Decoded ta kas pa Bauco, Rich Kalash, Jaido, ICONS, DXBT i  awor TSeaN. Pa mas informashon bishitá Youtube/Facebook/Instagram: @decodedofficial.