WILLEMSTAD.- Manfred ‘Feco’ Gomes, presidente di AMAK ayera tardi tabata kontentu paso nan a yega na un akuerdo ku Gobiernu. ‘Pa nos ta hopi importante ku awe porfin, despues di hopi reunion nos por a yega na un palabrashon ku e evento ‘Tumba Revival 2021’ por kontinua’, asina Feco a kuminsa indika durante di su diskurso.

‘Den nos seno nos a realisa ku Covid 19 tin su efektonan ta p’esei nos organisashon lo trata pa kumpli ku tur eksigensianan ku ta para den e protokol di Gobiernu ku nos tambe a akorda’.

Feco a splika ku ta kasi 10 luna di inaktividat tabatin i ku e musikonan tambe a sakrifika i awor nan tambe ta aporta. E gastunan pa organisa e evento ta enorme i musikonan ke duna Korsou bek.

Pa e ‘Tumba Revival 2021’ tin interesa pa transmishon for di Aruba, Boneiru i St. Maarten. Feco tabata agradesido na medionan di komunikashon ku semper a duna nan sosten pa Festival di Tumba por a sigui krese. AMAK a gradisi e tim di krisis i a indika ku apesar na prome instante e evento lo no a bai bira un realidat, pero huntu a yega na un solushon. Feco a gradisi Massive tambe ku a duna tur sosten na e evento.

AMAK a risibi sosten finansiero di Gobiernu, su branding partner MLS i tambe di kompanianan ku ta duna un sosten.

Mayan djaweps lo tin e konferensia di prensa kaminda nan lo presenta di forma ofisial nan branding partnernan.

FECHA:

Inisialmente a pone e siman di 1 pa 5 di februari pa e evento tuma luga, pero debi na tardansa pa yega na un desishon a opta pa organisa e evento den e siman di 8 pa 12 di februari proksimo. Durante dje anochi di transmishon bibu riba djabierne, 12 di februari lo bo bai tende tur e tumbanan ganado di 2001 pa 2020. AMAK ta kombensi ku nan lo bai duna pueblo di Korsou un bunita regalo.

Na final dje konferensia di prensa Minister Steven Croes a entrega Feco Gomes e protokol ku ta delinea e reglanan ku ta hasi posibel pa e evento por tuma luga.