WILLEMSTAD.- Ayera nochi AMAK, Asosashon di Músiko i Artista Kòrsou a tene un rueda di prensa kaminda a duna tur informashon riba ‘Tumba Revival Festival 2021’.

Manfred ‘Feco’ Gomes, presidente di AMAK durante su diskurso a kompartí basta informashon relashoná ku e evento.

Tumba Revival Festival 2021 (Ban rebibá historia di 50 aña festival di tumba) su meta prinsipal ta pa regalá pueblo di Kòrsou un siman di ambiente di tumba, pa  por disfrutá trankil den seno familiar, di un evento di un herensia kultural intangibel.

E evento aki ta un no komersial, ku AMAK , Gobièrnu di Kòrsou i  partnernan ta ofresé pueblo di Kòrsou.

FECHANAN

Manera a keda informá e siman di Tumba lo ta di 8 di febrüari te ku 12 di febrüari. Di

djaluna 8 di febrüari te ku 10 di febrüari : presentashon di tur e 50 tumbanan ganador respektivamente 16, 17 i 17 tumba riba e 3 dianan,  pa medio di grabashonnan di video, te kaminda esaki ta posibel na tur planta di TV, radio emisora i ret sosial.

Djaweps 11 di febrüari: Presentashon di e 20 tumba popular skohé pa  media  i lo pasa  e  video riba tur plata forma.

HERMANITO

Feco a gradisí Hermanito Narvaez pa su aporte importante pa por a realisá e kuater promé anochinan ‘Tumba Revival Festival’. E kolekshon grandi di grabashon ku Hermanito tin a pone ku AMAK por a sigurá ku nan tin tur tumba ganadó.

Djabièrnè 12 di febrüari: Presentashon di tumbanan ganador di 2001 te ku 2020 , kompañá pa un orkesta grandi bou di direkshon di maestro Gregory Colina riba e stage grandi na Festival Center.

E stage lo bira algu impreshonante, ku diseño i ehekushon na enkargo di Massive Productions.