WILLEMSTAD.- Dos piesa ku a keda graba for di aña pasa a keda finalisá resientemente i den fin di siman a keda lansa pa dje forma ei yuda ku e promoshon pa e biahe pa Ulanda ku e banda ta bai hasi próksimamente na komienso di luna di sèptèmber 2017.
‘DEN E BEMBE’ a kòmbersá ku Albertico Libiee, lider dje banda ku a indiká ku el a keda aserká pa e presentashon na Ulanda i ta despues ku a chek ku tur e otro músikonan si nan ta disponibel a tuma e desishon ku Tune ta bai Ulanda.
‘Si tin basta reakshon i si tin petishon pa TUNE presentá nos lo no duda pa toka. Ounke nos tin algun petishon kaba, nos ta wante mas pa okashon i lo no bira algu ku nos ta toka tur siman. Mi ta forma parti di Dreams i mi afsprak ku Axel lo no kambia. Meskos ta konta pa e otro músikonan ku tin nan kompromiso, ora tur músiko ta disponibel e or’ei nos ta bai guera. Si nan ta liber ku nan por toka, mi ta bisa si na e promotor’, asina Tico Libee a deklará na ‘DEN E BEMBE’.
Pa loke ta trata e 2 piesanan ku a keda lansa ‘Kara na Laira’ ku ta keda interpretá pa Luwi Jano ta un komposishon di MRaizz ku areglo di John Rojas. Pa loke ta trata e cover ‘Dushi Regresa’, original di Air Supply “All out of Love” a keda areglá pa Eric Ignacio i ta wòrdu interpretá pa Albertico ‘Tico’ Libiee.