WILLEMSTAD.- Despues nan eksitoso komedia den novèmber último “Balor di un Muhé” awor den ambiente di Karnaval nan ta trese un obra titulá “Tur hende ariba abou den grupo”.
Un obra skibí pa Kenneth Lopez i Nicky Rojer, dirigí i produsí pa Kenneth Lopez.
“Tur hende ariba abou den grupo” ta un obra chistoso pero na final ku un realidat. Un obra teatral ku lo pone bo hari te lora abou!. Bin mira kuantu kos hende ta hasi pa sali mihó grupo di aña. Bin mira kuantu kos hende ta hasi pa sèn. Bo ta kere den hende òf den bo mes? “Tur hende ariba abou den grupo”... kaminda tur hende tin un disfras, te ora ku esaki kai, nos mira ken ta ken i kua ta kua.
E obra ta konta ku elenko super profeshonal manera Cynthia Martina, Saskia Looman, Encho Henrique, Ellismar Hooi, Terry Wawoe, Kenneth Lopez i hopi mas.
Promé funshon lo ta djadumingu 02 febrüari, pa 7 or di anochi na Teatro Luna Blou. Karchinan ya ta optenibel na Beep Beep, Mensing’s Caminada. Bin buska bo karchi tempran pa bo gosa di un tremendo obra teatral.