WILLEMSTAD.- Apénas a anunsiá ku e edishon di e aña aki di Curaçao North Sea Jazz (CNSJ) lo sigui, ku e hotèlnan den e área a yena. No tin mas lugá. Pa kolmo Curaçao Marriott ta den remodelashon i tin ménos akomodashon den e área aki e aña aki.

Informashonnan ku EXTRA a haña ta ku na momentu ku e anunsiá ku e edishon di e aña aki no ta sigui, tabatin sierto tristesa di akomodashonnan den e área. Asina ku tabatin un anunsio ofishal, tur hotèl a yena.

Un di e organisadónan a konfirmá ku en bèrdat esei ta e kaso. Riba su mes no ta nada ku e hotèlnan ta buska un bida den e temporada aki, pero e organisadónan i tambe otro sektornan tin masha problema ku e preisnan eksorbitante ku ta pidi tur aña. Tin biaha e preisnan no ta hustifiká konsiderando e kalidat i nivel di e akomodashonnan. Den añanan ku a pasa tabata pidi tin biaha hasta 400 pa 500 dòler pa kamber.

Un otro aspekto ta e echo ku tin basta reklamo pa algun aña kaba ku e akomodashonnan aki no ta yuda den e aktividat. Ku otro palabra, nan ta probechá di e echo ku otronan ta hinka nan mes sèn den e evento aki i nan ta piki e frutanan di esei sin hasi mashá. Esei por sierto ta un di e puntonan ku e organisadónan a pone tambe riba mesa di gobièrnu indikando ku ta tur hende ku ta probechá di e aktividat mester duna nan aporte. Awor aki esei no ta e kaso.

Ademas tin algun di e akomodashonnan ku no ta ni miembro di Asosashon di Turismo i Hotèl (CHATA). Ke men CHATA tambe ta man mará den sierto sentido. A anunsiá ku e partidonan den e kaso aki ku ta e organisadónan i gobièrnu lo sigui papia pa den 2018 tin un aporte di gobièrnu di Kòrsou tambe den e totalidat. Te ku awor aki ta e organisadónan a karga tur gastu.

EXTRA tin informashon ku un di e ideanan ku ta biba ta pa den futuro kaminda sitio di e aktividat. E intenshon ta pa wak un tereno ku ta un tiki mas leu pa organisá e aktividat aki. Si esei ta e kaso, e ora e akomodashonnan den e área por lubidá ku nan por gosa di esfuerso di otronan.

A anunsiá kaba ku e aña aki lo no bai tin konsierto grátis manera tabata e kaso aña pasá. E konsierto grátis a bai pèrdí despues ku a parti karchi pòrnada aña pasá riba Dia di Bandera loke a generá basta polémika. Gobièrnu no tabata kontentu i a kritiká e desishon. E aña aki tur hende mester paga pa Curaçao North Sea Jazz Festival ku ta programá pa 31 di ougùstùs, 1 i 2 di sèptèmber. Otro luna lo kuminsá anunsiá e promé artistanan pa e aña aki.