WILLEMSTAD.- Ayera tardi Fundashon Karnaval di Banda Bou a duna informashon di preparashon pa loke ta trata aktividatnan di Karnaval e wikènt aki na Banda Bou.
E fundashon i tim di transishon a kuminsá na informá ku djabièrnè mainta 9 or lo tin e Marcha di Skolnan.
Inspektor Granville di Kuerpo Polisial a indiká ku Kuerpo Polisial ta prepará pa por garantisá seguridat di tur hende. Pa djasabra for di 8 or di mainta lo sera Kaya Prospero Rojer te na altura di Kaya Johannes Francisco. Aserka sr. Granville a informá ku despues di marcha lo tin asistensia di Polis na diferente sitio riba kaminda di Bándabou pa garantisá seguridat.
Johnny Isabella dje tim di transishon a indiká ku tur trailer i bar mester ta 12 or na Daniel p’asina por hasi huntu bai e punto di salida di e marcha. Dje forma aki ta na un sierto momentu so e tráfiko lo ta pega.
Un punto ku a hala atenshon ta e informashon ku Rignald Maduro a kompartí. Lo no permití niun DJ ku no a keda kontratá pa presentá den e marcha di Bándabou pa partisipá na e marcha. Esaki ta en konekshon ku un flyer ku tin riba retnan sosial kaminda un dje ta ofresiendo públiko e oportunidat pa biba e eksperensia di partisipá den Karnaval riba trailer di un DJ.
Marcha di Karnaval di Bándabou ta sali 3 or for di Hòfi Abou i lo terminá na vèlt di Barber.