Hopi no tabata kere ku por, awor si hopi ta kere ku Kòrsou por

WILLEMSTAD.- E selekshon di Kòrsou a dal otro paso grandi i por nota ku tur kaminda den komunidat hendenan ta kontentu ku e logro positivo aki. P’esei EXTRA a puntra Jean Francisca kiko ta su sentimentunan.  ‘Nos a traha un plan pa yega Qatar na 2022 i ta esei nos ta bezig kuné. Tur loke ku ta pasando ta den e kuadro ei. Nos no a yega kaminda nos mester bai, ta Qatar nos ke yega. Ta den e plan ei nos ta.”

Manera ta konosí, ta basta tempu pasá a kuminsá ku e plan pa prepará e futbòl lokal pa yega mas serka di e grandinan di futbòl den mundu. Pa esei a traha un plan ekstenso. Segun Francisca, den deklarashon na EXTRA, a kuminsá ku e plan pa bai Qatar dos aña pasá despues ku kampionato mundial a finalisá na Brazil. A base di esei a buska Patrick Kluivert ku tabata asistente de Louis van Gaal, pa e selekshon di Ulanda. Patrick su mama ta yu d Kòrsou i ta via di su tio a aserk’é pa logra hañ’é pa e por bini ku algu nobo pa Kòrsou.

E tempu ei a kuminsá kaba ku hungadónan di eksterior, pero e resistensia interno, esta na Kòrsou mes tabata hopi fuerte, i asina a konkluí ku mester bai na un otro nivel. A base di esei a bini ku Kluivert, pero despues el a haña otro oferta i el a bai. Despues di esei a tuma Remco Bicentini ku tabata asistente di Patrick. Asina a kuminsá ku e plan pa Qatar te ku a yega asina leu pa hunga e prome wega na Qatar mes kontra Qatar. Den e partido ei Kòrsou  a gana 2-1. Despues a hunga kontra Bolivia den dos wega i despues a bai National League kaminda Kòrsou a klasifika pa e grupo A, i awor aki Kòrsou a klasifika pa Gold Cup loke ta tumando lugá awor aki.

Riba e pregunta di EXTRA kon a dil ku e resistensia i negativismo lokal Francisca a indiká: ‘ta asina Kòrsou ta. Nos problema grandi ta ku nos no tin unidat na Kòrsou. E rèspèt pa ku otro tampoko no tei.” Mas aleu el a sigui splika ku e strategia ku e ta usa pa basta aña kaba ta di keda positivo, transparente, kere den ser supremo i dal bai ku loke e ta kere den dje  i no wòri ku loke hende ta bisa pasobra simplemente e hendenan ei no ta yuda e kousa ku nada. Ademas e hendenan negativo no ta bin yuda pa hasi e trabou tòg pues ku nan ta pèrdèdó so lo tin.

Jean Francisca ta satisfecho, te kaminda Kòrsou su selekshon ta awor aki e ta satisfecho ounke e ta konvensí ku e selekshon por mihó. E ta spera ku e tim lo hunga mihó ainda kontra Merka. E ta konvensí tambe ku Kòrsou su selekshon por pasobra el a mira Kòrsou presta mihó asta na Kòrsou mes. Esei mester sosodé. E meta ta pa yega Qatar i no pa gana Gold Cup so, esaki ta inisio pa yega e meta máksimo ku ta pa yega Qatar.

Francisca ta wak bek i ta bisa: Hopi aña pasá ku nan a kuminsá ku e idea masha tiki hende tabata kere den dje i awor ku Kòrsou a yega dje leu aki  por mira ku mayoria hende ta kere awor si ku e ta posibel. ‘No lubidá ku Kòrsou a gana tres ekipo ku tabata mundialista, manera Honduras, Jamaica i Salvador. Kòrsou a klasifika sakando dos mundialista hunga na nan kas.” Na palabra Jean Francisca.