WILLEMSTAD.- Djadumingu 29 di mart lo bai tin un tremendo konsierto di e legendario  banda di rock Twilightzone ku tabata hasi furor den añanan  70.
E banda aki a produsí 3 músiko profeshonal ku despues a hasi hopi impakto na Kòrsou i internashonalmente. E kantante di e grupo ta Harry Moen konosido direktor di e grupo Serenada ku ta hasi  estrago ku  e músika folklor di Kòrsou. Riba solo kitara i leader musikal di e banda ta e konosido músiko international di jazz, Cedric Dandare, un pionero i promé yu di Kòrsou ku ya na aña 95 a saka e promé CD ku músika di Kòrsou manera tumba, seú, dansa etc. meskla ku jazz pa e prestigioso kas diskero, Sony Columbia Music. E CD aki a keda publiká mundialmente i t'esun ku a habri e kaminda pa mas grabashon di e género aki.
Riba kitara bas tin e basista internashonalmente rekonosé Eric Calmes, basista di mil i un kampaña den diverso gruponan manera Zamanakitoki. Pues tres músiko sali fo’i di kuna di e banda Twilightzone ku a bai konservatorio i awor lo uni un biaha mas.
Tokando keyboard  ta e persona di management, e konosido Rafael Pichardo di Crosstown Traffic, Vida Nova i hopi proyekto mas. Drùmer ta e konosido drùmer, Axel Prudencia (Unisono i Siembra) miembro di e famia musikal Prudencia. Tambe lo bai tin diferente kantante invitá manera Kevin Carty, Toni Fernan, Rose Heije i Andre Pichardo.
E banda ta bai  tembla Hacienda Olivia tokando tur e piesanan konosí di aña 70 tempu di Rock vibrationshow den Roxy i fiestanan di M.I.L.  Pa korona e anochi lo tei D.J Angelo Virginie ku huntu ku Twilightzone lo zona tur e hitnan di Doobie Brothers, Isaac Hayes, Beatles, Jimmy Hendrix, Joe Cocker etc.
Bin rekordá añanan 70 den un ambiente hopi dushi i trankil i bunita. E orario ta di 5 or di atardi pa 10 or di anochi. Karchinan ta optenibel na Mensing’s Caminada i serka tur e miembronan di Twilightzone. No ta bende karchi na porta. No pèrdè Hacienda Olivia Garden Party.